Stuhi dimërore historike në Amerikën Veriore: Kaos në SHBA dhe Kanada
Një stuhi dimërore me përmasa historike ka goditur Amerikën Veriore, duke përfshirë Shtetet e Bashkuara dhe Kanadanë, me borë të dendur, akull dhe temperatura ekstreme që kanë paralizuar jetën e përditshme. Mbi 190 milionë njerëz në SHBA janë nën alarme dimërore, ndërsa kushte të ngjashme po përjetohen edhe në provinca të mëdha kanadeze.
Në SHBA janë anuluar mbi 10 mijë fluturime, me ndërprerje të rënda në aeroporte kryesore si Dallas, Chicago, New York dhe Boston. Transporti publik është pezulluar në disa shtete, rrugët janë bllokuar nga bora dhe autoritetet u kanë bërë thirrje qytetarëve të qëndrojnë në shtëpi. Edhe në Kanada, aeroportet dhe rrugët kryesore po përballen me vonesa dhe mbyllje për arsye sigurie.
Temperaturat kanë rënë deri në –30 dhe –50 gradë Fahrenheit ndjesi termike, duke e bërë të ftohtin ekstrem kërcënimin më serioz për jetën. Mbi qindra mijëra familje kanë mbetur pa energji elektrike në shtetet jugore dhe qendrore të SHBA-së, ndërsa frika për ndërprerje afatgjata ekziston edhe në zona të Kanadasë.
Deri tani, 17 shtete amerikane kanë shpallur gjendje emergjence dhe autoritetet federale kanë aktivizuar ndihmën përmes FEMA-s. Qendrat e ngrohjes janë hapur në dhjetëra qytete për të mbrojtur personat më vulnerabël.
Autoritetet në të gjithë Amerikën Veriore apelojnë për kujdes maksimal, shmangie të udhëtimeve dhe ndjekje të udhëzimeve zyrtare, ndërsa kjo stuhi po vë në provë serioze infrastrukturën dhe kapacitetet e emergjencës në të dyja vendet.
